《大國崛起》 vs 《解構中國黑幫》

趁住仲有兩日先開學，呢幾日都仲係好relax咁睇下電視上下網。睇完今日《歲月風雲》，劇情開始有d 進展，雖然都係不外乎經常係無記見到既幾位演員。

由於幾個禮拜前教會崇拜時牧師曾經講過《大國崛起》呢個節目，所以當無記逢星期一十點半都播呢個北京中央電視台既節目既時候都會特別留意。而同一時間，亞記就以《解構中國黑幫》打對台。《大國崛起》基本上係講現今世代幾個世界強國點樣由無變到有，今日講既係自己曾經渡過三四年寒暑既阿美利加共和國。講世界大國崛起既標題當然十分有趣，但綜觀呢個節目講既野都不外乎中學時代世界歷史科既內容，無咩新意，而且比較皮毛。加上狄娜姐姐既語調，好容易令人眼訓。

今日，我就轉左去亞記睇《解構中國黑幫》。製作上亞記呢個節目唔夠《大》花錢多，節目裏面無咩3D動畫睇下d 西洋船點樣係個海度漂，但就勝在夠深入。節目裏面一開始提到清末民國果時既三大幫會，然之後再深入去講清幫既三大頭目，各自點樣發圍同上位。內容由於講以前既上海有幾咁腐敗同埋黑暗，以前從來無係教科書裏面睇到，所以比起《大》有趣味得多。