人靠衣裝？

今年既會考好有趣，所有既十優狀員都比果兩位十四同埋九歲既小朋友搶晒風頭。呢兩位小朋友有個共通點，就係以比平常人細既年齡去考到一d 高班少少既考試，而且獲得滿意既分數。中大同浸大無放棄呢個可以宣傳既機會，係其他大學無乜插手既情況之下收左呢兩個學生，成為好熱門既話題。

呢個情況就其實好似六年前政府armarm推出拔尖計劃咁，當時只要讀到五支A就可以參加拔尖計劃，早人地一年入大學，「享受」大學既生活比人多一年。當年仲未夠中五既我就當然為著唔使考AL呢個目標進發，因為知道只要考夠分，就可以玩足一個中六，然之後升大學。一個字講晒，「爽」。身邊既朋友平時唔多讀書既一個二個走晒去煲書，知恥近乎勇，大家都考得唔錯。當然，拔尖就無我份，唔係都唔會步另一批既同學後塵飛左去美國。

今年呢兩位小朋友正好就話比後面既人聽，教育制度可以不理，只要你去考，考得掂就係神仙。我諗接下來應該會有更多既家長希望自己個仔/女可以好似呢兩位大學生咁，未夠十五歲已經大學畢業。

--

不過家長迫細路仔讀書都還好，今日我搭地鐵，中環站上車，係金鐘站有幾個人衝左入黎，帶頭既係一位師奶，佢一手就扯住佢個女隻手，推左佢埋一個位度，然之後將自己果兩塊股分別放係兩個位度。再之後佢大嗌︰「wei 快低過離挫拉！」無耐之後有兩位男仕他他調咁行過黎，小朋友好乖咁話「媽媽我比你坐。」果三個成年人之後就好高談闊論咁講話佢地買左既手信有幾好有幾靚。當然，係用普通話。睇真d，媽媽用既係英國格仔牌，其中一個男人用既係啡底兩隻英文字母牌。

小妹妹係好乖咁比左媽媽坐，但後來佢走左去一條扶手度，踎低左，係度轉，同埋大聲叫喊一d我唔係好聽得明既野。當時呢個小妹妹係著住連身裙同粉紅色涼鞋。我望下周圍，見到無遠既一條扶手度，又有另一個小妹妹，同樣係連身裙粉紅色涼鞋，唔同既係呢個小妹妹好乖咁企係度，只係間中偷偷咁望個小妹妹。

中國人有句俗語，「人靠衣裝」，今日見到呢幾位身光頸靚既人之後，我反而覺得著咩上身唔係問題，只要有教養就得啦。