《交響情人夢》

無記星期日晚十點半播既《交響情人夢》講述幾個音樂系學生既故事，男主人翁千秋（大人）係一個公認既靚仔音樂天才，小提琴鋼琴樣樣得，而且係學校裏面亦都 十分受歡迎，再加上佢細個既時候已經被一位名指揮家話過要收佢做徒弟既關係，所以一直都非常自負。但由於因為曾經遇過空難既關係一直都唔敢再搭飛機，所以 鬱鬱不得志要留係日本無得出國。

另一個女主角野田妹（nodame）就係一個污遭到極既女仔，但天生異品，只係靠聽就可以彈返晒成首野出黎。可惜因為細個既時候跟著個壞老師，係咁迫佢練琴既關係所以佢對彈琴失去興趣。但由於佢非常有天份，所以只需要隨便練下就可以見得下人。

故事中野田妹非常喜歡千秋，但千秋就對野田妹一d興趣都無（開始既時候）。故事維繞住呢兩個人係學校發生既事情，同埋後來千秋由鋼琴系既學生變左佢地A樂團既指揮既事。電視版就做到呢度，漫畫版後來千秋就有機會出國，又參加比賽做註團指揮之類云云。

作為音樂系既我當然十分有興趣，而呢套劇係日本亦都非常賣得，隨既而來既配套都接踵咁黎。但我想講既其實係跟師傅既問題。由於聽日要見新師傅既關係呢幾日要印返今年內寫既最新幾首野出黎，同埋要執返d 錄音出黎燒隻CD聽日拎去，希望師傅有時間聽。

千秋係故事中有機會跟世界出兩大指揮家學野，而呢兩位師傅都不斷比機會千秋。其實跟著位好老師進步真係快好多。諗返自己既情況，去美國讀左三年幾書之後，自己不嬲覺得都還過得去既小提琴就已經生疏晒，因為覺得自己細個既時候學錯姿勢已經無得進步。反而轉修既作曲就因為跟著位好老師，一直都唔嫌我煩係咁比意見，所以進步比較明顯（雖然放左既三個月假咩都無做過）。今次返黎香港，真係希望可以學到好多野。

當我行落街見到林林種種既琴行既時候我就會諗，究竟有幾多個教緊琴既真係有料到，可以教到個學生第時可以用黎搵食？定一或係好似我以前中六咁，為左搵錢就走去教琴呢？

名師收得貴，唔係無佢既道理。