搵工

早排有機會同個中學既師弟講揀科既野，我同佢講如果我可以再揀過，我一定唔會揀音樂，亦都只會係電腦同埋business 兩科任擇其一。我舉左一個例︰

係美國既四年大學制裏面好多時學生係第一年升第二年既暑假（即係所謂既freshman 升sophomore）既時候就已經會搵intern。以一個只讀左freshman既大學生黎講通常搵到工既機會好低，其中一個原因係因為佢地未揀定主修科目，所以就算係請都只會係一d 低工資既工作（當然由於美國有最低工資，比起香港低極有限）。

到第三年升第四年既時候（junior升senior），朋輩間既話題就只有一個——「諗住下年點？」呢個時候，通常最先話已經搵到工畢業後即有人請既一定係business既同學們。原因除左因為學校名氣大之外，就係因為d 公司睇中佢地名校畢業，覺得資質一定極好，所以高人工高福利請佢地去做。第二種人可以搵到工既就係讀電腦既。幾年前科網爆破既時候一個二個都話唔好讀電腦，話咩無前途無出路。結果幾年後馬照跑舞照跳，電腦系既同學不愁無出路。再加上兩大電腦公司M記同G記爭人，除左出錢出力請佢地去見工之餘，公司既福利更好到不得了。其中以G記為甚。一個二個電腦系既朋友都想入G記辦事，貪佢公司內部照顧周到，連飯堂都搵大酒店廚師黎煮。

係另一方面，我自己身處既音樂系就無咁活躍，甚至可以話係零活躍。從咁多位朋友口中得知佢地下年要做既野不外乎兩樣︰一）自修一年之後報碩士；二）教書。其中就只有一位比環球唱片請左做marketing。其餘既大都前途未卜。

果日同個小師弟講，「興趣還興趣，現實還現實，我揀左呢條路無得返轉頭，如果你真係鍾意，最起碼都double major 啦。」