師拉唔易做

今日搭日士，發覺師拉真係唔易做。首先，要面皮厚，學識搭訕。然後，又要學識直腸直肚，有果句講果句。再然後，又要熱心幫人。又再然後，要不怕努苦，搭成個鐘車由港島去美乎飲茶。

地點︰是日下午港島區城巴97x 往九龍方向

師拉甲問師拉乙︰喂知唔知係邊度轉車去美乎？
師拉乙︰唔知wor，係咪呢度附近落？

（繼續討論，巴士進入全港最貴隧道）

師拉丙（明顯與上述兩師拉素未謀面）︰喂，其實總站落左車由南昌行過去，好快到架wor！我地行都唔使十分鐘！
師拉甲︰但我唔行得咁耐嘛（年紀比較老）
師拉丁（師拉丙朋友）︰不如你去問下司機啦！佢應該熟d...
師拉乙︰係loh！

（師拉甲徐徐走到正在駕駛的司機身旁，對白未能竊聽）
（問畢，師拉甲回坐位）

師拉甲︰司機大佬話果度有小巴去，好快就去到啦！
師拉乙︰免費架？
師拉丙︰下？咁著數？
師拉丁︰點會呀！
師拉甲︰梗係唔係啦，要比錢架！
師拉丙︰不如行過去啦！真係十分鐘行到架啦！

（一輪混戰）

（場邊阿叔加入戰團，明顯與兩團師拉事情並不認識）

阿叔︰不如搭小把啦，幾蚊，唔使行得咁辛苦！
師拉丙︰講真，其實我未搭過去總站。（然後望住師拉丁）不如我地又搭去總站當行下街，還掂之後都要轉車架啦！
師拉丁︰下，又搭黎搭去。

（又一輪混戰）
（師拉甲乙此時正商討應該在何處落車）
（情況開始有點白熱化，眾師拉激動）

師拉丁發難︰乜你咁多野講架！
阿叔此時充當和事佬︰佢熱心幫人啫！
師拉丙︰係loh！唔講野邊有得傾計？哈哈哈
師拉丁︰咁你都唔使講咁多野架！

（後刪數十甚至數百段對話，直至我到達目的地）
（下車時，我偷看一下司機的表情，發覺一臉無奈）